見面前準備三樣嘢，見面時問清楚公司
第一次見面唔係去聽公司介紹，而係互相了解。你資料準備得齊，公司先講得出實際方案同大概價錢；你問得清楚，先分到邊間公司做嘢有交代。
單位資料
平面圖、每個房嘅相同片、屋苑名、面積、樓齡同入伙日期。
- 平面圖（有尺寸更好）
- 相片同影片
- 管理處裝修守則
生活需要
住幾多人、點用每個空間、要保留咩、鍾意咩風格。
- 人數同生活習慣
- 要保留嘅傢俬電器
- 5 至 10 張靈感相
預算同時間
全屋預算上限、應急錢、幾時要入伙，邊啲自己買。
- 預算上限（連傢俬電器）
- 預一成應急錢
- 最遲入伙日
真實完工作品、設計費同改圖次數、報價會唔會逐項寫牌子型號、邊個跟你個單。其餘問題喺下面清單逐條剔。
材料要寫到「驗收得到」先算清楚
香港裝修最多爭拗嘅位，係報價只寫「一式」或者「或同級」。見面時就講明你想要嘅牌子同做法，叫公司逐項寫落報價。
寫得出牌子型號，先算數
每項物料寫牌子、系列、型號、尺寸同數量；淨寫「一式」或者「或同級」都要追問。
包定唔包，逐樣講
瓷磚、潔具、門五金、燈帶、油漆系列，逐樣問「包唔包」；唔包嘅自己買，問清安裝費。
升級只補差價
想轉好啲嘅料（例如竹炭漆、Blum 五金），講明由原本項目扣減，只補差價。
底料一樣要寫
防水、膠沙、批灰、間牆磚呢啲睇唔到嘅底料，最易被換平貨，一樣要寫明。
報價應該咁寫
- 防水
唔好寫：
浴室防水一式要咁寫：浴室地台連牆身塗高 1.8 米：西卡 107 兩層，做完閉水試驗 24 小時
- 瓷磚
唔好寫：
客廳鋪地磚要咁寫：客廳地磚：過底磚 600×1200，膠沙鋪；馬貝掃粉（業主自購，顏色業主揀）
- 油漆
唔好寫：
全屋油漆要咁寫：全屋立邦竹炭系列兩底兩面；如果唔包，轉竹炭只補差價
- 訂造櫃
唔好寫：
衣櫃一套要咁寫：主人房衣櫃 6 尺：E1 板，工廠訂造，唔用三合一扣板；Blum 油壓鉸同路軌；LED 燈帶（包／唔包）
- 水電
唔好寫：
全屋水電翻新要咁寫：全屋換新電線（寫明牌子同線徑），英國標準銅喉；完工交 WR1
- 燈帶火牛
唔好寫：
燈帶連火牛要咁寫：燈帶用插線式火牛，另交兩至三隻同款後備
牌子只係住戶常用例子，唔係推薦或者廣告；最緊要係寫低牌子、型號同做法，到時驗收有根據。
間隔同需要：畫、寫、排三步講清楚
「想闊落啲、多啲儲物」公司好難做；「兩個人住，要 6 尺衣櫃同書枱位，廚房要封閉」就做到。講用法，唔好淨係講感覺。
- 1
畫
喺平面圖上圈出想拆、想加、想保留嘅位，插蘇同燈位都可以畫低。
- 2
寫
每間房寫一張房間卡：邊個用、做咩、要放咩、有咩唔鍾意。
- 3
排
分開「一定要」同「有就好」，超預算時公司知道點刪。
房間卡範本
- 房間
- 邊個用（人數／年紀）
- 主要做咩（瞓覺／工作／煮食／儲物）
- 一定要
- 有就好
- 要放嘅傢俬電器（連尺寸）
- 插蘇／燈位要求
- 保留唔郁
- 唔鍾意
每間房複製一張，填好之後 WhatsApp 俾每間公司，大家收到同一份需要。
設計公司最想你準備嘅 8 樣資料
站喺公司角度：資料齊，度尺一次就報得準，少改圖、少追加。你準備好呢 8 樣，第一次見面已經好有效率。
屋苑、面積、樓齡
舊樓同新樓嘅水電、拆卸範圍差好遠。
平面圖同現場相
未上門都可以初步度方案同估料。
預算範圍
知道上限，先出到啱嘅方案，唔使改完又改。
入伙日期
排到工期同自購料到貨時間。
要保留嘅嘢
唔會報埋唔使做嘅工程。
風格同物料取向
靈感相加一句鍾意乜，比十張相更有用。
邊啲自己買
報價唔會重複計，時間表亦排得準。
邊個拍板
確認快，少改圖、少延誤。